Nagalab-ot na sa 2,295 ang kaso sang balatian nga dengue dire sa probinsya halin Enero 1 tubtob Agusto 5 subong nga tuig base sa datos sang Provincial Epidemiology Surveillance Unit sang Provincial Health Office sang South Cotabato.
Ang nasambit nga numero ang manubo sang 23.1 percent kumparar sang nagligad nga tuig sa kapareho nga period.
Apang yara na sa 13 ang patay sa balatian nga dengue nga ang banwa sang Polomolok ang may madamo nga napatay tungod nagalab-ot sa lima, ginasundan sang syudad sang Koronadal may tatlo, duha sa Surallah kag tig-isa naman ang narekord nga patay sa banwa sang Sto. Niño, T`boli kag Tupi.
Nagapanguna naman sa may mataas nga kaso sang balatian nga dengue sa probinsya ang syudad sang Koronadal nga may 646, Polomolok 410, Tupi 348, Surallah 202, Banga 151, Sto. Niño 112, Tantangan 106, T`boli 102, Norala 96, Tampakan 70 kag Lake Sebu 52.
Hot spot area naman sang balatian nga dengue ang Brgy. Poblacion sang Polomolok kag Brgy. Poblacion sang Tupi.
Paklaro naman ni Dr. Rogelio Aturdido Jr. Provincial Health Officer sang South Cotabato nga kon nagtaas man ang kaso sang nasambit nga balatian kag nagapanguna sa datos sang Department of Health Region 12 ang probinsya ini tungod posible aware na ang katawhan kag nagapadulong na gid sa mga health facilities.
Apang nagapadayon ang ila nga panawagan sa mga pumuluyo suno kay Dr. Aturdido nga kon mahimo maghulag man batok balatian nga dengue.
