14 na nabiktima sang palupok sa South Cotabato.

Ginakasubo sang pamunuan sang Provincial Health Office sang South Cotabato ang mataas na nga kaso sang firecracker related injuries ukon nabiktima sang palupok sa probinsya bag-o pa man ang pagsugata sang bag-ong tuig.
Ini tungod sa subong nagalab-ot na sa 14 ang kaso base sa datos sang Provincial Epidemiology Surveillance Unit sang talatapan halin Disyembre 13 tubtob Disyembre 27, 2017.
Ang nasambit nga datos ang mataas sang 100 percent kumparar sang nagligad nga tuig sa kapareho nga period.
Sa datos ang syudad sang Koronadal kag banwa sang Banga ang may mataas nga kaso sang firecracker related injuries nga may-yara sang tig-3, tig-2 naman sa banwa sang Tupi, T`boli kag Surallah kag tig- isa naman ang nabiktima sa banwa sang Polomolok kag Tampakan.
Kadam-an naman sa biktima ang yara sa edad nga 0-10 years old nga may pito kag 5 ang nagaedad sang 11-20-anyos.
Ginkumpirmar ni Dr. Rogelio Aturdido Jr. Provincial Health Officer sang South Cotabato halos iligal naman ang klase sang palupok kapareho sang piccolo, camara, boga, plapla, flying tiger, 5-star, triangle ang nakabiktima.
Samtang ang iban nga klase sang palupok nga nakabiktima ang flare gun, improvised canon kag 3 ang nabiktima sang kwitis nga ginakabig legal.
Sa subong suno kay Dr. Aturdido indi pa nila mahibaluan kon ano ang rason ngaa nagataas ang nabiktima sang palupok antes pa man ang pagsugata sang bag-ong tuig sa pihak nga nagapadayon man ang ila nga kampanya kontra palupok.