Ipailalom na sa cash card ang pagbayad sa 141 ka sakop sa Pantawid Pamilyang Pilipino Program o 4Ps sa Department of Social Welfare and Development o DSWD.
Kini aron mabayran na ang 141 ka sakop sa 4Ps nga wala pa makadawat og cash grants tungod sa pagka-delatar sa pagpangita og conduit nga service provider.
Ang maong mga benepisaryo sa 4Ps gikan sa lungsod sa Aloran, Jimenez, Sinacaban, ug Tudela nga sakop sa probinsiya sa Misamis Occidental.
Ang UCPB nga bangko mao ang mohatag og cash cards nga adunay sulod nga kwarta isip ilang cash grants ngadto sa 141 ka benepisaryo aron maka-withdraw gilayon kini.
Ang nasampit nga benepisaryo wala gyud makadawat sukad sa ilang cash grants niining tuig 2017.
Matud ni Director Nestor Briones Ramos, Regional Director sa DSWD Field Office 10, ang mao nga lihok mao ang pagseguro nga mahatagan gyud sa cash grants ang mga benepisaryo nga padayon gasunod sa mga kondisyones sa programa.
Gidugang niini nga una kini nga higayon nga ang 4Ps nakig-negosasyon sa pribadong bangko, sama sa UCPB, isip pag-decentralize sa pay-out sa Land Bank of the Philippines.
Naandan na sa DSWD nga hatagan ang mga benepisaryo sa ilang cash grants pinaagi sa LBP.
Makakuha og cash grants ang benepisaryo pinaagi sa cash card o sa offsite payment matag duha ka bulan.
Base sa datos sa DSWD Field Office 10, adunay 4.3 milyon ka mga benipisyaryo sa tibuok Pilipinas diin kapin sa 270,000 kanila anaa sa Northern Mindanao.
PR: DSWD 10
