BACOLOD CITY – Isa ka dalaga kag isa ka soltero ang ginbuno sang duha ka hubog nga mga suspek sini gid lamang nga kaagahon sa Gatuslao St., Brgy. 11 Bacolod City.
Nakilala ang mga biktima nga sanday Nicole Alvaran, 21 anyos ang edad, residente sang Carol St., Brgy. Sum-ag kag si Eric Lagan, 20 anyos, pumuluyo sang Purok Maanyag sang amo man nga barangay.
Ginkilala naman ang mga suspek nga sanday Jonathan Pabon, 22 anyos, residente sang Cegasco, Brgy. Pahanocoy kag John Real Alvarez, 19 anyos, pumuluyo sang Purok Mabinuligon, Brgy. Sum-ag.
Suno sa mga biktima nga hubog ang mga suspek kag sa wala gintumod nga rason kag motibo, hinali na lamang ini sila nga ginbuno may mga las 12:30 kaina sang kaagahon sa area sang Nueva-Gatuslao Streets, Brgy. 11.
Si Nicole ang nag-angkon sang pilas sa iya likod samtang may igo naman sa iya dughan ang biktima nga lalaki.
Ang mga biktima lunsay gindala sa Corazon Locsin Montelibano Memorial Regional Hospital samtang padayon naman nga ginalagas ang mga suspek./dyHB BACOLOD
