Amediante el maga devoto Catolico ya ta apunta para na Iglecia para atende con el Misa de Gallo, dos man bisinos ya sale muerto durante el diila peleya na Covarrubias Drive, Divisoria enantes aga.
Antede man alas 3 del aga cuando si Genaro Jarlega Apelo armao de pusil ya anda man gubad na casa di canda Eric Dulatre Serito, 50, donde ya man pelyajan estos.
Durante el diila peleya, ya sopla de tiro si Apelo con Serito y ya tupa conele na bariga y cuando ya tumba si Serito, dayun tambien su anac si John Eric y el yerno si Jamal Jumdail Sasapan, 23, ya hace apas con Apelo llevando piedra y sanggut.
Ya sopla tambien de tiro canila si Apelo pero nohay mas tupa hasta ya puede conele tahya y embona de piedra canda John Eric y Jamal.
Ambos con canda Apelo y Serito ya lleva na hospital epro estos ya despidi.
Si Apelo ya sostene monton irida de tajo y golpe de piedra mientras si Serito ya sufri un tiro na bariga.
Con canda John Eric y Jamal ya aresta el maga pulis y ya pone na calaboso.
