Moabot ngadto sa 20 ka mga panimalay ang nasunog kagahapon sa kapin ala 1:00 ang takna sa hapon. Kini nahitabo sa Accretion, Brgy. Macabalan ning syudad sa Cagayan de Oro.
Gibutyag sa Bureau of Fire nga ilang nadawat ang information sa maong sunog mga 1:40 ang takna sa hapon kung diin miabot ngadto sa 3rd alarm.
dali kining girespondihan sa kabomberohan ug gideklarang under control na kini mga 2:30 ang takna kagahapon.
Basi sa inisyal nga imbestigasyon nga gihimo sa mga personahe sa Bureau of Fire Protection nga nagsumikad ang sunog sa panimalay sa pamilyang Dalundonan. Padayon pa karon ang pakisusi sa BFP kung unsay hinungdan sa maong sunog.
Hinuon, walay natalang casualties kon mga samaron sa maong insidenti kung diin mokabat ngadto sa 2.4 milyones ka pesos ang damyos sa maong sunog nga girespondihan sa 10-12 ka mga fire trucks sa syudad.
Ang mga biktima karon ana-a gipahimutang sa Macabalan Elementary School isip evacuation center aron mahatagan sa pasiunang ayuda.
Nasayran nga kapin sa 30 ka mga pamilya ug moabot ngadto sa 128 ka mga indibidwal ang naapektohan sa nahitabong sunog.
Sa pikas bahin, nanawagan si Brgy. Macabalan Kapitan Norbel Sa-a ngadto sa katawhan nga dunay malumong kasing-kasing nga andam silang modawat sa bisan unsa mang tabang bisan pa man nga dunay calamity fund ang Barangay apan bukas ang ilang buhatan sa pagdawat sa mga hinabang gikan sa katawhan.
Kasama mo sa balita, RadyoMaN Andy Coco, DXCC Tatak RMN!
