Matud ni DCWD Spokesperson Joanna Duhaylungsod nga lauman sa mga konsumante ang 20 porsento nga usbaw sa bayrunon sa tubig karong tuiga.
Segun ni Duhaylungsod nga niadtong miaging mga tuig gi-aprubahan sa Local Water Management ang ilang aplikasyon nga patas-an og 60 porsento ang bayrunon sa tubig diin gibahin sa tulo ka hugnaan ang pagpatuman niini aron dili bug-at sa mga konsumante.
Unang hugna sa implementasyon sa rate increase ang 30% sa miaging tuig, 20% karong tuiga, ug 10% sa tuig 2024 ug kung makumpleto na ang 60% kini nagpasabot nga anaa sa 100 pesos ang kinatibuk-ang madugang sa bayrunon kon anaa sa 170 pesos ang cubic meter sa tubig nga magamit sa mga konsumante.
Ug tungod ini, lauman na sa mga konsumante sa residential ug sa commercial ang paglobo sa ilang water bill matag bulan hatud sa laing hugna sa increase nga mapatuman diin dili pa matino kon unsa nga buwan karong tuiga mag-epekto ang laing hugna sa usbaw.
Dugang pa sa tigpamaba nga ang usbaw sa bayrunon magtudlo usab sa mga konsumante nga magdaginot ug dili magpasagad og paggamit sa tubig sa ingon dili sila magbaguod og bayad tungod sa pagdako sa ilang water bill matag buwan.
RadyoMaN Joel Viray
