207 sa 2,262 ka mga kandidato sa Region 10 sa milabayng May 13 election ang wala maka-submit sa Comelec sa ilang Statement of Contribution and Expenditure kon SOCE.
Mao kini ang gibutyag ni Comelec Regional Director Reynato Magbutay sa interview sa dxCC-RMN.
Matud ni Magbutay nga kining 207 ka mga kandidato, nag-atubang sa 15-mil pesos nga multa nga ipahamtang sa Comelec, silbing ilang administrative fine.
Gibutyag ni Magbutay nga multahan sa Comelec ang mga kandidato nga wala mosubmit sa ilang SOCE human sa ilang katapusang deadline niadtong Hunyo uno.
Hinoon, wala nganli ni Magbutay ang mga kandidato apan naglakip na niining 207 ang pipila ka mga kandidato sa pagka congressman, Gobernador, Vice Governor, Board members, City and Municipal mayors, Vice mayors ug mga City and Municipal Mayors.
Matud ni Magbutay nga mahimong dili na maka-apil sa politika ang maong mga kandidato nga wala maka submit sa ilang SOCE sa COMELEC.
“Posibli nga kadtong wala mag-submit sa ilang SOCE, dagko to silag gasto sa milabayng eleksyon nga hadlok masakpan sa Comelec nga nakalapas sila sa balaod” matud ni Magbutay.
Gibutyag ni Magbutay nga sigon sa Comelec law, ang mga kandidato, gitugotan lamang nga mogasto sa tres pesos kada botante sukad pagsugod sa kampanya hangtud sa adlaw sa eleksyon.
Matud ni Magbutay nga dili makalimod ang mga kandidato kon pila ka milyon ang ilang gasto sa milabayng eleksyon.
Gibutyag ni Magbutay nga ang ilang Campaign finance Unit sa Comelec, maoy gitahasan sa pagsusi sa gasto sa mga kandidato basi sa ilang SOCE nga gi-submit sa Comelec.
“Kon mamakak ang mga kandidato, masapon gihapon sila, kay ang atong Campaign Finance Unit sa Comelec, maoy magkuhag record sa mga establishment aron masusi gyud kon pila gyud ang nagasto sa maong kandidato” matud ni Magbutay.
Matud ni Magbutay nga ang mga business establishments, sama sa mga Radio and TV stations, mga Printing Press ug uban pang establishment, obligado nga mohatag sa ilang records sa nabayad sa mga kandidato sa ilang pagpa advertise sa radyo ug TV bisan ang record sa mga printing Press.
“Pananglitan, ang usa ka kandidato nagpa imprinta sa daghan nga tarpaulin, kuhaon man sa among Campaign finance Unit ang record sa maong printing Press, masapon gihapon ang kandidato kon mamakak siya sa iyang SOCE” matud ni Magbutay.
Gipasabot ni Magbutay nga kadtong midaog ug napilde nga mga kandidato obligado silang tanan nga magsubmit sa SOCE sa Comelec.
