General Santos City—nagpadayon ang gihimong ombistigasyon sa Polomolok Municipal Police Station kalabutan sa nahitabong pagpamusil patay sa 23 anyos nga batan-on sa may Anastacio Subd., Barangay Poblacion, Polomolok , alas 8:00 ang takna sa gabie.
Biktima giilang si Earol Aldenese, 23, residenti sa Anastacio Subd., Barangay Poblacion, Polomolok.
Gibutyag ni Police Sr. Inspector Ludovico Rendaje, Deputy Chief Of Police sa Polomolok PNP nga robbery ang gituohan nilang motibo sa pagpamusil sa biktima. nasayran nga igo rang nag lingkod ang nasangpit didto mismo sa ilang lugar dihang kalit lang syang giduol sa usa ka lalaki.
Gisultian matud pa sya sa suspek nga ihatag ang cellphone niini apan inay ihatag gilabay na nuon sa biktima ang iyang cellphone mao nga siya gipusil sa suspetsado.
Paspas nga misibat ang suspek sakay sa motorsiklo samtang ang biktima gidala sa Bontoyan Hospital apan gibalhin sa St. Elizabeth Hospital dinhi sa Gensan gumikan sa kritikal nining kahimtang.
Pila ka oras ang nakalabay, nakabsan gihapon og kinabuhi ang biktima sa balay tambalanan. Nasayran nga dunay samad pinusilan ang nasangpit sa iyang liog nga hinungdan sa iyang kamatayon.
