SAGAY CITY, NEGROS OCCIDENTAL – Ginahanda na ang pag-process sang Philippine Army para maka availa ang kapin 25 ka mga katapo sang NPA nga nagsungka sang nagligad nga Sabado sang aga sa Sagay City sang mga benepisyo sa idalum sang Enhanced Comprehensive Local Integration Program ukon E-CLIP.
Ini matapos nga kapin sa 25 ka armado nga mga miembro sang New People’s Army nga naga-operate sa boundaries sang Murcia, Don Salvador Benedicto kag San Carlos City diri sa Negros Occidental ang nagsungka sadtong Sabado – March 2, 2019 may mga las 10:30 sang aga.
Bitbit ang ila mga armas, ang amo nga mga rebelde ang nagsungka sa 79th IB kag 6th Special Action Battalion, Special Action Froce sang Philippine Army subong man sa 1st Negros Occidental Provincial Mobile Force Company sang PNP sa 79th IB Headquarters sa Brgy. Bato, Sagay City.
Pinaagi sa isa ka ceremony, ginturn-over sang mga ini ang ila mga high powered firearms kag mga bala sa atubang ni 303rd Infantry Brigade Commander Col. Benedict Arevalo, kay Negros Occidental Police Provincial Director, Police Col. Romeo Baleros kag kay Ma. Fatima Diaz, Provincial DILG North Cluster Leader.
Kalakip sa ginturn-over sang rebelde amo ang 4 ka US garand rifles, 1 ka US M14 rifle, 4 ka shotgun, 3 ka US M16 rifles, isa ka Magnum 22 rifle, 12 ka calibre .45 nga pistola, 2 ka 9mm sub-machine guns, isa ka .38 calibre nga revolver, 14 ka assorted magazine sang rifle kag pistola subongman 2 ka Shotgun bandoliers nga may bala.
Nahibaluan nga sa idalum sang E-CLIP, ang isa ka nagsungka nga rebelde makabaton sang gilayon nga cash assistance nga kapin P15 mil pesos, livehood assistance nga P50 mil pesos, firearms remuneration nga halin P12 mil tubtub P500 mil pesos, tunga nga house assistance, Philhealth kag medical assistance, education assistance, housing assistance, legal assistance kag healing and reconciliation initiatives./DYHB NEWSROOM
