Mukabat sa 27 ka mga kanhi miyembro sa New Peoples Army kon NPA ang nakadawat ug ayuda gikan sa Department of Social Welfare and Development kon DSWD Bukidnon kagahapon.
Sa interview sa RMN Malaybalay ngadto kang Lt. Kenneth Cabiggat, ang civil military operations officer ug spokesperson sa 8th Infantry Battalion kon 8 th IB gibutyag niini nga nakadawat ang 27 ka former rebels ug tag-5,000 pesos kada usa sa gihimong turn-over ceremony kagahapon sa buntag sa kampo 8 th IB sa lungsod sa Impasug-ong, Bukidnon.
Gawas niini nadawat usab sa mao nga benepisiyaryo sa Balik Loob Program ang medical, educational, ug burial assistance package gikan sa gobyerno.
Sigun ni Cabiggat nga anaa sa 135,000 pesos ang na-release sa DSWD nga ayuda.
Nasayran nga nitahan ang maong mga kanhi NPA kaniadtong Disyembre 19, 2018 nga mukabat sa 50 kabook.
Matud ni Cabinggat nga makadawat usab sa susamang kantidad ang laing 23 nga mga kanhi NPA alang sa ikaduhang batch.
Kabahin matud pa ang mao nga tabang pinansiyal sa Enhance Comprehensive Local Integration Program kon E-Clip.
Atol usab sa mao nga programa subling nanawagan si 403rd Brigade commander Col Edgardo De Leon sa mga miyembro sa NPA nga pabilin pang anaa sa kabukiran nga mutahan na ug mubalik sa sabakan sa gobyerno aron makabaton sa malinawong pagpuyo.
