General Santos City—Himas rehas na ang tulo ka magsuong wanted human nasikop sa Manhunt Charlie Operation sa Malapatan Municipal Police Station alas 10:00 sa buntag niadtong nakalabayng adlaw sa Barangay Daan Suyan, Malapatan, Sarangani Province.
Mga suspek giilang silang si Garry Empa, 28, no. 1 most wanted; Demo Empa, 30, no. 2 most wanted ug Boyet Empa, no. 3 most wanted municipal level ug pulos residenti sa Sitio Lam Afos, Barangay Kinam, Malapatan.
Gihimo ang operasyon pinaagi sa gahum sa warrant of arrest nga gipagula ni Hon. Judge Jaime Infante sa Branch 38-11th Judicial Region gumikan sa kasong Murder.
Wala na nakaporma pa ang mga suspek human nga nakorner sa kapulisan
human silang nakadawat ug impormasyon nga anaa sa Barangay Daan Suyan ang mga suspetsado.
Sa karon commitment order nalang ang gihuwat sa kapulisan aron hingpit nang mabalhin sa Sarangani Provincial Jail ang mga suspek.
