Davao City- Gipangita karon sa kapulisan ang tulo ka mga suspek kinsa gitudlo nga maoy nilugos sa duha ka mga estudyante didto sa Cor. Apokon and Ayala Avenue, Tagum City niadtong nakalabayng semana adlawng Martes sa gabie.
Giila ang mga suspek nga sila Emerson Urgel Tormis, 25 anyos , Aron Cabaling, 29 anyos ug usa ka dise sais anyos nga menor de edad.
Gibutyag ni PSI Anjanette Tirador hepe sa Women and Children Protection Desk sa Tagum Police Station nga ang tulo ka mga suspek nag atubang na karon sa kasong may kalapasan sa RA 8353 kun Anti-Rape Law ug RA 7610 o Protection Against Child Abuse, Exploitation and Discrimination human nila panamastamasi ang duha ka mga dise-sais anyos nga mga dalaga.
Asoy ni Tirador nga ang duha ka mga senior high school students gikan og himo sa ilang school project ug nilahos ngadto sa New City Hall aron mulantaw sa Giant Christmas Tree una pa man sila giatngan sa mga suspek.
Gibutyag sa imbestigador nga ang usa sa mga kaubanan sa tulo ka mga suspek nga nag-edad og katorse anyos maoy nitabang ngadto sa mga biktima.
Human nga gipakita ang mga hulagway sa tulo ka mga suspek ngadto sa mga dalaga positibo kini nilang gitudlo nga maoy nilugos kanila.
Giendorso sa WCPD ang mga biktima ngadto sa DSWD aron ipailawom sa psychosocial intervention.
RadyoMan Aimee Guinita
