Davao City – Nagpadayon karon ang imbestigasyon sa Tagum PNP labot sa pagsibat sa tulo ka mga sakyanang SUV sulod sa usa ka hotel sa Visayan Village, Tagum City, Davao del Norte alas-10 sa gabii kagahapong adlawa, Martes, Enero 21, 2020.
Sa interbyu sa DXDC RMN Davao kang Police Lt. Colonel Ariel Acala, Office in Charge sa Tagum City Police Office, gibutyag niini nga gipanag-iyahan ang maong mga sakyanan ni Hitler Banes, usa ka negosyante nga taga Cebu City ug mga kauban niini.
Saysay ni Acala nga kalit lamang sumala pang misulod sa hotel ang mga armadong tawo nga naka suot og bonnet ug gikuha ang digital box sa closed-circuit television (CCTV) camera sa hotel, gisulod pa ang lawak sa negosyante ug kaubanan niini ug gikuha ang susi sa mga van.
Walay nakuha nga kwarta gikan sa mga biktima gawas lang sa tulo ka sakyanang ilang gisibat.
“Walay laing gikuha except lang sa yabe sa sakyanan unya gi-drive ang sakyanan pasibat,” saysay ni Acala.
Nakig-alayon na karon ang kapulisan sa mga biktima aron mapapalawman ang imbestigasyon ug masayran ang motibo sa insidente.
RadyoMaN Kirby Manzon
