General Santos City–Gikumperma ni 1st Lt. Jerry Maborrang, Spokesperson sa 73rd Infantry Battalion, Philippine Army nga andam mohatag ug 2 milyones ka pesos ni Davao Occidental Governor Claude Bautista ngadto kang Kumander Yoyong ang lider sa grupong new People’s Army ilawon sa guerilla Front 71 nga naglihukan sa Davao Occidental.
Matud pa ni Maborrang nga mismong ang gobernador maoy nag-anunsyo atol sa usa ka programa nga gipahigayon sa Barangay Tanuman niadtong Hulyo, 23 nga siya mohatag ug 2 milyones pesos kang Kumander yoyong bugti sa iyang pagsurender sa gobyerno.
Ang dos milyones maoy gamiton sa nasampit para sa pagsugod ug bag-ong kinabuhi uban sa iyang pamilya. Gawas niini buot usab sa gobernador nga personal mahinabi si Kumander Yoyong kung hatagan lang kini ug higayon sa lider sa NPA.
Dugang pa ni Maborrang nga Gawas sa 2 milyones pesos nga gisaad ni Governor Bautista kang Kumander Yoyong, hatagan sab niini ug balay ang nasampit.
Wala pay labot niini ang uban pang binipisyo nga posible niining dawaton ilawom sa programang Enhance Comprehensive local Integration Program kon E-Clip.
Gihingusgan matud pa sa gobernador nga tawo ra usab si Kumander Yoyong nga nalihis ug dalan ug kinahanglan sab kining tagaan ug tsansa nga magbag-o sa iyang kinabuhi.
Gawas kang Davao Occidental Governor Claude Bautista muhatag usab ug tig P500,000 silang si Sarangani Governor Steve Chiongbian solon ug Malapatan mayor Sombo alang ngadto kang Kumander Yoyong bugti sa pagtahan niini sa iyang kaugalingon ngadto sa gobyerno.
Higayon nga dawaton ni Kumander Yoyong ang tanyag sa tulo ka mga opisyal sa managlahing probinsya kinatibuk-ang 3 million pesos ang iyang madawat.
Samtang nanawagan sab si Maborrang kang Kumander Yoyong nga mokontak lang deretso kaniya pinaagi sa Cellphone number nga iyang gihatag o dili ba kaha sa ilang mga opisyal sa lungsod o sa barangay higayon nga makadesisyon na kini sa pagtahan sa iyang kaugalingon ngadto sa gobyerno.
