BAGO CITY – Tatlo ka mga kalalakin-an ang nakaagum sang pilas sa ila kalawasan matapos nga nagbunggo ang ila gina sakyan nga motorsiklo sa natuo nga bahin sang ulo sang aircon nga Ceres Bus nga may rota Bacolod-Canlaon.
Ang Ceres ang may Body No. 5561 nga ginamaneho ni Ronny Denosapal, 32 anyos kag pumuluyo sang Sitio Mananawi, Barangay Masulog , Canlaon City.
Ang driver sang motor amo sanday Leonard De la Cruz, 21 anyos, nagaangkas naman sa iya si Kenneth Bryan Banate, 20 anyos kag Ernesto Singson, 23 anyos tanan sang Barangay Aguisan, Himamaylan City.
Basi sa pahayag ni PO1 Alvarez sang Bago City Police Station nga ang tatlo sakay sa motor kag nagabyahe halin sa Sur pakadto sa Norte nga direksyon agud kuntani magreport sa ginatrabahuan nga construction.
Paglab-ot sa Crossing High School nag-cross ini sa dalan kag nagbunggo sa Ceres nga halin sa Norte pa-Sur.
Ginalantaw nga posibli napiyungan ang driver sang motor nga si De la Cruz bangud bisan pa sang kalaparon sang dalan didto pa ini nagbunggo sa natuo nga bahin sang ulo sang Ceres Bus nga yara na nahamtang sa pinakakilid sang dalan bangud hana na kuntani ini nga mapundo.
Sa karun ang tatlo ka sakay sa motor ang yara na sa Corazon Locsin Memorial Regional Hospital.
Gin-impound naman sa Bago PNP ang bus kag motorsiklo samtang ang driver yara man sa talatapan sang Bago PNP. / DYHB/Grace Supe
