Roxas City, Capiz – Patay ang 30 anyos nga lalaki matapos ginluthang sa Barangay Bula, Mambusao, Capiz alas 9:05 ang takna kagab-i. Nag-angkon sang tatlo ka igo sang bala sa dughan kag tiyan ang biktima nga ginkilala kay Sulpicio Soriano, residente sang Barangay Maninang, Sapian, Capiz.
Sa inisyal nga imbestigasyon sang Mambusao PNP, nagalakat ang biktima sa karsada sa nasambit nga lugar upod sa iya abyan nga si Efren Loyola,agud magpangita sang gasolina nga igatug-hong sa iya motorsiklo. Sang yara na sa nasambit nga lugar sanday Efren kag Sulpicio, gulpi lamang nga ginluthang sang wala pa makilala nga suspek ang biktima.
Suno pa kay Loyola, nakit-an sini ang tatlo ka mga lalaki nga suspek nga nakasakay sa tricycle kag nagpalagyo matapos ang pagpangluthang. Gindugang pa sini nga ginbungguan pa sang mga suspek ang biktima nga nagahuray-ad sa dalan. Gindala pa sa Mambusao District Hospital ang biktima, rmnapang gindeklarar nga dead-on-arrival.
Narekober sa lugar ang walo tanan ka basiyo sang 9mm pistol nga amo ang gingamit sa nasambit nga krimen. Nahibaluan nga nag-inom pa sa balay ni Efren Loyola ang biktima antes nagluntad ang nagluntad ang insidente. Sa karon gina-establisar pa sang mga kapulisan ang matuod nga motibo kag identity sang mga suspek sa pagkaluthang-patay kay Sulpicio Soriano.
