300 ka mga Barangays, drug cleared na sa Bukidnon

Gikalipay karon sa probinsyal nga pangagamhanan ang pagpagawas sa datus gikan sa buhatan sa Philippine Drug Enforcement Agency (PDEA)-Bukidnon diin miabot na sa 300 ka mga barangay dinhi sa probinsya ang gideklara nga drug cleared.

Kini ang nasayran atol sa pagpahigayon sa 1st Quarter Provincial Anti-Drug Abuse Council & Peace and Order Council Meeting didto sa Kaamulan Open Theatre, Malaybalay City.

Nasayran nga basi sa makuting balidasyon nga gihimo sa buhatan sa PDEA-Bukidnon, pakig koordinar sa mga kapolisan ug pag abag sa local government, anaa na sa 35% ang kalamposan o 300 ka barangay ang drug cleared sa kasamtangan samtang gideklara usab nga 21 ka barangay, o 5% ang nagdeklara nga unaffected/drug free barangays.

Subay niini duna pay one hundred forty-three (143 o 30%) ang nahabiling mga barangay nga naga padayon sa pagpatuman sa Barangay Drug Clearing Operation para sa hingpit nga tingoha nga ma drug cleared.

Samtang gi-update usab atol sa maong panagtigum nga duna nay napahigayon ang maong buhatan nga 13 ka Community-Based Anti-Illegal Drugs Advocacy Trainer’s Training ngadto sa mga kalongsoran nga sakop sa Bukidnon para mas mapakusgan pa ang tingoha nga ma drug cleared ang intero probinsya.