SIPALAY CITY – Ginabuligan na sang 303rd Brigade Philippine Army paagi kay Col. Benedict Arevalo ang duha ka mga intel officer nga ginpadakop sang mga katapo sang National Union of People’s Lawyer (NUPL) sang Sabado.
Suno kay Arevalo, ginaasikaso na sang ila nga legal team ang kaso nga ginpasaka ni Atty. Atty. Teofisto Melisa.
Attempted murder ang una nga ginpasaka nga kaso sa Sipalay City Prosecutor’s Office apang sa ulihi gindowngrade ini sa grave threat bangod wala man sang natabo nga pagpamahog, kondi namutikan gid lamang nga ginasunod sunod sang duha ang salakyan sang grupo sang mga abogado.
Para kay Arevalo, gusto nya lang nga hatagan sang security ang mga ini bangod kay indi lang sya gusto nga militar naman ang mabasulan kon may malain nga matabo sa mga grupo ni Atty. Benjamen Ramos.
Ang duha ang may mission order man sa iya kag wala sya sang nakit-an nga malain sa ginhimo ilabi na kon nagaka’praning’ ang mga katapo sang NUPL.
Kon riding in tandem ang duha wala sang riding in tandem nga magasunod sa ila target halin sa Bacolod padulong sa Sipalay suno kay Arevalo.
Kahapon sang hapon, ginlubong na si Atty. Ben Ramos, nga kilala man sa Bacolod bilang human rights lawyer.
Madamo ang nag-upod sa iya ulihi nga palahuwayan ilabi na ang mga progresibong grupo sa Sipalay Public Cemetery.
