Gipusil patay mga alas nuybe kagabei ang usa ka 33 anyos nga lalaki sa Purok 4, Bonbon, Catarman, Camiguin Province.
Matud ni Bonbon Barangay Kapitan Toping Rodriguez nga naila ang biktima nga si Jefrem Rugay, minyo, residente sa maong lugar.
Samtang ang gitudlo nga suspek nailang si Richard Oyao alyas ‘’emboy’’, ulitawo, residente gihapon sa maong dapit.
Nasayran nga gipusil ang biktima samtang nag-ingkod-ingkod sa ilang panimalay.
Samtang gipanghimakak sa suspek nga si Richard Oyao, nga siya ang mipusil patay sa usa ka Jefrem Rugay.
Matud ni Kapitan Toping Rodriguez sa Barangay Bonbon, Catarman Camiguin nga dili pa sigurado kung si Oyao ang suspek tungod kay walay nakakita sa hitabo.
Dugang pa ni Kapitan Rodriguez nga migawas lamang nga si Oyao ang gitudlong responsable sa krimen tungod kay gikulata kini sa biktima kauban ang mga higala niini niadtong miaging semana.
Samtang, giangkon sa amahan sa suspek nga si Candilario Oyao, 72 anyos, taga Bonbon, Catarman Camiguin Province nga gikulata ang iyang anak sa usa ka Jefrem Rugay, kinsa gipusil patay kagabei.
Matud ni Oyao nga dili tinuod nga ang iyang anak nga si Richard Oyao ang mipusil sa biktima tungod kay wala kini molakaw kagabei.
Dugang pa sa amahan, andam hinloan sa anak ang pangalan niini pinaagi sa pagtahan mismo ngadto ni Bonbon Kapitan Toping Rodriguez.
