Naglab-ot sa 35 ka mga pamilya ang ginpabakwit sa Barangay Lake Lahit kag Brgy. Talisay sa Lake Sebu, South Cotabato tungod sa “unsual” nga current kag volume sang tubig sa spring sang Merl Garden Resort kag Lake water level sa Lake Lahit.
Suno kay Lake Sebu MDRRM Action Officer Roberto Bagong, 2 ka mga pamilya sa Brgy. Lake Lahit nga malapit sa Merl Garden kag 33 ka mga pamilya sa Brgy. Talisay sa diin padulong sa nasambit nga lugar ang tubig halin sa spring ang apektado sang ginpatuman nila nga preemptive evacuation.
Sa subong suno kay Bagong temporaryo nga nagtinir sa ila nga himata ang mga bakwit.
Pahayag ni Bagong nga nag-umpisa suno pa ang pagkusog sang tubig nga halos 10 ka bes sa normal sang Mayo 25 nga ginadudahan tungod sa nagdaku ang outlet sang Lake Lahit kag posible may koneksyon sa nagluntad nga linog.
Ginakabalak-an man ang pagluntad sang landslide sa lugar tungod padayon ang pagkusog sang tubig.
Samtang suno kay Bagong nagpatigayon na kahapon nga adlaw sang assessment ang Mines and Geosciences Bureau ukon MGB 12 kag magadepende suno pa sa resulta kon bala pabalikon pa ang mga residente sa ila nga puluy-an.
