General Santos City— Mukabat na sa 287 ka operasyon batok illegal nga droga ang napahigayon sa rehiyon gikan Disyembre milabay’ng tuig ngadto na Pebrero 28, 2018.
Sumala kang Police Chief Inspector Aldrin Gonzales, tigpamaba sa Police Regional Office 12 nga gikan sa maong ihap, 369 na ang naaresto nga gilangkuban sa 28 ka mga user ug 341 ka mga pusher.
Samtang 14 ang naitalang patay, duha niini user ug 12 ang mga pusher nga sumala pa misukol atol sa gihimong operasyon.
Pagpaklaro ni PCI Gonzales nga hugot gyud ang direktiba ni Police Chief Superintendent Marcelo Morales, regional director sa PRO 12 nga kung mamahimo, liakyan gyud ang maduguong operasyon.
Apan dili matud pa kini malikayan hilabina kung mabutang na sa alanganin ang operatiba. Kung asa iyahang gihingusgan nga dili tinuyuan sa kapulisan nga mapatay ang ilahang mga target.
Sukwahe matud pa kini sa mga pasumangil kanila hilabina sa kabanay sa mga napatay atol sa operasyon.
