Cuatro persona ya sale irido inclujido el un arsonista mientras cuantos casa el ya man uput na quema na Nangka Drive, Tugbungan del Lunes serca serra el noche.
Asegun na report del bumbero, si Abdulpatta Maruji y Pamaran, 55, casao native de Malinis, Lamitan y ta queda na Tugbungan, ya empesa este sindi conel tres casa y tienda di canda Zoilo Araneta.
Asegun una ya sindi el suspechao el su cuarto donde le ta arquila desde conel familya Araneta.
Y despues ya sale este afuera armao de bolo y ya empesa sopla de taho con todo quien ta pasa na lugar.
Primero ya tahya el suspechao con Ma. Dovie Biason y ya tupa na su detras por cuatro beses.
Y despues ya sale na calsada el suspechao y ya tahya tambien Jerry Mias Baya y Concillado, 33 y consu esposa Lovielyn Baya y Awatin, 29,quien aquel tiempo ta pasa munato na diila motorsiclo.
Atiempo tambien ta pasa si SPO2 Anthony Huesca y ya puede nutraliza con el suspechao pormedio de tira conele na ambos braso.
Con el suspechao y conel maga victima ya lleva na hospital.
Asegun conel anac del suspechao ya queda este paciente na ward 9 del Zamboanga City Medical Center.
