Gipangunahan ni Senate Majority Leader Migz Zubiri ug ni TESDA Secretary Isidro Lapeña ang turnover ceremonies sa upat ka mga Technical Education and Skills Development Authority (TESDA) training centers sa probinsya sa Bukidnon kagahapong adlawa.
Ang maong mga training centers nahimutang sa mga lungsod sa Impasugong, Cabanglasan, Lantapan, ug Maramag.
Ang mao nga proyekto kabahin sa inisyatibo ni Senador Zubiri nga pagtukod ug mga local government unit-based TESDA training centers sa Bukidnon alang sa anti-poverty ug anti-insurgency program sa probinsya.
Laumang dugang TESDA training centers usab ang tukuron dinhi sa siyudad sa Malaybalay, ug mga lungsod sa Kitaotao, San Fernando, Kibawe, Quezon, Talakag, Malitbog, Baungon, Kalilangan, Sumilao, Damulog, Kadingilan ug Dangcagan.
Nasayran nga sa mao nga bag-ong upat ka training centers, ang Bukidnon aduna nay TESDA training centers sa duha ka mga siyudad ug 20 ka mga lungsod nga maoy pinaka-unang probinsya nga adunay LGU-based TESDA-operated training centers, nga mapahimuslan sa mga anaa sa pinaka-ubos nga hut-ong sa katilingban.
Ang proyekto kabahin usab sa education-focused poverty alleviation projects sa probinsya gawas pa sa expansion sa Bukidnon State University pinaagi sa extension campuses.
