New Washington, Aklan – Ap-at rong patay matapos nga ma-trap sa bobon sa Sitio Centro Barangay Lawaan, New Washington, Aklan kahapon.
Ro mga biktima nakilaea kanday Darwin Cuesta, 48-anyos, Jodel Felizardo, 47-anyos, Rene Felizardo, sa legal nga edad tanan residente it nasambit nga lugar ag si Hermenio Bantang, sa legal nga edad ag ginasugid sangka albularyo ag residente it Brgy. Bubog, Numancia.
Base sa impormasyon nga nabuoe it RMN Kalibo sa lugar nga sambilog sa ap-at nara rong nagpanaog sa bobon matapos nga ma trap sa idaeom kung sa siin maga tabang kunta rong tatlo ugaling pati sanda hay na trap man.
Insigida nga nagtawag ro mga residente sa MDRRMO New Washington ag nagpangayo pa gid it ayuda sa PDRRMO Aklan.
Pag-abot sa lugar it mga rescuer gintan-aw nanda rong bobon ag ginasugid nanda nga grabe kabaho rong hugom nga indi masyran kung anong klase it kemikal. Uwa anay it may ginpahinugutan nga magpanaog kanda ay basi pati sanda maging biktima man.
Nagpangayo pa gid sanda it bulig sa Bureau of Fire Protection Kalibo (BFP) bangud nga sanda ra ro may dugang nga mga equipment ag pa-abot hay gin umpisahan rong search and retrieval operation.
Una nga nahapatakas rong eawas ni Darwin, sunod ay Jodel, pangatlo ay Germenio ag ro pang ap-at nga medyo nabuhayan bangud nga nagapanangit ro anang siki ag alima ag may kabahueon hay si Rene.
Matapos nga sanda ra hay mapatakas insigida nga gin daea sa Aklan Provincial Hospital pero tanan sanda hay gin deklara nga dead on arrival.
Rong nasambit nga bobon hay may kadaeomon nga kapin sa 40 feet.
Ginapatihan nga posible na-suffocate rong mga biktima ukon nakuryente bangud nga may nakita idtong extension nga posible naabot it tubi.
Samtang sa pakikipag-angot mat-a it RMN Kalibo kay Punong Barangay Pascual Remetio it nasambit nga barangay ginpamalibaran nana nga uwa imaw nakasayod nga may mga mawra una sa lugar bangud nga uwa man imaw dikara haadto ay ro eogta hay private property.
Kahapon eamang imaw nakasayod matapos nga may mag imporma kana nga may na trap sa bobon sa nasambit nga lugar.
Sa makaron hay padayon pa raya nga gina imbestigahan it mga otoridad nga kon ham-an may mawra nga kadaeom it bobon sa kilid it tangke ag may natabo nga insidente sa lugar.
