ISABELA – Patay ang 44 anyos nga habal-habal driver matapos ini ang ginluthang pasado alas 8:30 kaina sang aga sa proper sang Barangay Sebucauban.
Ang biktima ang ginkilala kay Jomarie Daleos Saracia alyas Junjun, may asawa kag residente sang nasambit nga lugar.
Nagalakat padulong sa simbahan ang biktima sang ini ang ginsugata sang lima ka mga armado nga mga lalaki kag ginpalukpan sang lima ka beses nga nagresulta sang iya gilayon nga kamatayon.
Matapos ang insidente ang mga suspetsado ang madasig nga nagsakay sa duha ka mga motorsiklo kag gilayon nagpalagyo.
Narecover sang mga kapulisan ang basiyo sang cal. 45 nga pistola.
Suno sa pila ka mga saksi, nakabati pa sila sang tinaga nga ‘NPA’.
May mga report nga ginasiling asset sang militar si Saracia rasun nga ginhimo sang mga rebelde ang pagtiro.
Ang bangkay sang biktima ang yara nahaya karun sa Nalagon Funeral Home sa banwa sang Isabela.
