Gibana-banang mokabat sa 5 million pesos ang structural damage sa pagkasunog sa bodega sa PLDT sa Max Suniel Street, Barangay Carmen ning syudad kaganinang alas-4:06 sa kadlawon.
Gibutyag ni SFO3 Samson Velarde, ang hepe sa fire station sa Barangay Carmen nga ang bodega sa PLDT puno sa mga cable wires, electronic equipment ug mga combustible materials apan wala pa masayri unsay hinungdan sa pagkasunog niini.
Dugang pa ni Velarde, nga ang nasunog mga rubber insulators gikan sa tonii-toninadang cable wires nga maoy naghatag kalisod sa mga fire fighters sa pagpalong sa sunog, nga miabot sa 4th alarm.
Gibutyag sa Bureau of fire protection nga mga alas 4:06 sa kadlawon gi-declare sa BFP ang first alarm; 4:07 2nd alarm; 4:08 3rd alarm ug 4:13 ang 4th alarm.
Gipahayag usab ni District City Fire Martial Col. Allan Cabut nga mga alas-7:40 kaganina sa buntag dihang gi-declare nila ang insidente nga “fire confined”.
Kini nagpasabot nga napugngan na sa mga bombero ang pagkaylap sa kalayo sa silingang mga boarding houses nga anaa sa likod sa bodega.
