iFM Laoag – Natay ti maysa a motorista kalpasan ti napasamak a panagkakarambola dagiti nagduduma a behikulo iti Manila North Road paset ti Brgy. Tabug iti Siudad ti Batac.
Segun ti PNP Batac nabigbig ti biktima a ni Mr. Patrick Domingo, agtawen duapulo ket maysa (21), addan ti live-in partner, maysa a construction worker, residente ti Brgy. Sta Cruz Currimao, Ilocos Norte nga inturongna ti motorstar 125 iti pumaammianan direksion idin ta kasinnabat na ni Mr. Emerson Duran, agtawen tallupulo ket walo (38), addan live-in partner, maysa a driver ken residente ti Brgy. Suyo, Laoag City.
Basar ti inisial nga imbestigasion ti PNP Batac ti biktima ket limmumba iti kasarunona a behikulo a rason ti panagdinnungparda iti kasabatna. Iti daytoy kapaspas a pasamak ket nagsasaruno a nairaman pay dagiti behikulo a Mercedes Benz nga inturong ni Mr. Jayferson Panilo, agtawen tallupulo ket walo (38), awanan asawa, maysa a mangisursuro iti Mariano Marcos State University, Batac City, residente ti Brgy. Puritac, Pinili, Ilocos Norte, Black Kawasaki nga inturong ni Mr. Regie Sabio, awanan asawa, maysa a family driver ken residente ti Brgy. Canaan, Badoc, Ilocos Norte iti lugan ti security guard iti Mariano Marcos State University nga inturong ni Mr. Sonny Viloria a residente ti Brgy. Morong, Badoc, Ilocos Norte. (Joe Anne Agustin, RMN News)
