PALO, LEYTE – Ginhihinulat na han mga Leytenos ngan Taclobanon partikular na an mga nangungukoy ha ressetlement sites nga matagan ngan matauran na hira hin kable han tubig.
Mayada man gud 565-million pesos water supply project an gobyerno para hini pero waray la gihapon ka-iimplementar ngada yana.
Sumala kan Tacloban City Planning Office Head Janice Claire Canta, kinahanglan nga ma-endorso utro han Regional Development Council an proyekto ngadto ha Malacanang para ma-download na daw iton kwarta.
Mahihinumduman, duha na katuig iton nakalabay matapos nga pirmahan an Memorandum Of Agreement han Local Water Utilities Administration (LWUA), National Housing Authority, Dept. of Public Works and Highways (DPWH) Region 8, Leyte Metropolitan Water District (LMWD) ngan Tacloban City Government.
Maghihimo hin linya tikang ha permanent source han tubig ha LMWD treatment plant ha Pastrana, Leyte nga maghahatag hin supply ha mga resettlement sites. Siring ni Canta an 565 million pesos nga pondo, in available na.
Napapausa naman hi RDC Private sector representative Tiburcio Morales kun kayano nadedelay ini nga proyekto nga nag-order naman hi Presidente Rodrigo Duterte nga kompletuhon an permanent water supply project.
Dugang ni Morales, kulang ngan mahinay iton koordinasyon han mga ahensya han gobyerno para matapos ini nga proyekto.
