General Santos City—Dakpan sa tropa sa Police Station 4 ang usa ka 58 anyos nga lalaki nga itago lang sa pangalang Alias Benedicto (Gituyo ug tago ang pangalan kay ang biktima silingan ra sa suspek), residenti sa Barangay City Heights, Gensan human gialigarang nanglugos ug 7 anyos nga batang babaye niadtong nakalabayng adlaw.
Subay sa blotter report sa Police Station 4 nasayran nga midangop sa buhatan sa Police Station 4 ang ginikanan sa biktima human misumbong kanila ang nasampit nga kuno siya gihilabtan sa suspetsado.
Subay sa saysay sa bata ngadto sa iyang ginikanan, nanghulam matud pa kini ug cellphone sa suspek aron dulaan.
Samtang siya nagduha ug Cellphone gisabak matud pa kini sa suspek dayon gihubuan siya ug short ug didto na niini gihimo ang pag-among among sa biktima.
Human nahimo sa suspek ang iyang dautang laraw, iyang gihatagan ug 20 pesos ang biktima dungan sa bahad nga dili mosumbong sa iyang ginikanan. Higayon matud pa nga siya mosumbong, sila pamatyon sa nahisgutan.
Miuli ang biktima sa ilang panimalay nga dawsa wala sa saktong panghuna-huna mao nga natingala ang ginikanan niini ug dihang siya gipangutana, didto na misumbong ang biktima sa gihimo kaniya sa suspek.
Sa karon ang suspek, balhog na sa silda sa Police Station 4, samtang hugtanon niining gihimakak ang aligasyon kaniya sa biktima.
