Sa tatlong adlaw nga selebrasyon it 1st Kalibo Riverside Sports Festival sa Tinigaw sa banwa it Kalibo gina burubanta nga umabot sa limang libo ka tawo ro nagtambong kara.
Raya ro pagpahayag ni SB member Philip Yerro Kimpo, Chairman it Committee on Tourism sa live interview ni Kasamang Ernie Sambuang it programang DYKR Straight to the Point kainang agahon.
Dahil kara gin kalipay it husto ni SB Kimpo ro rayang madinaeag-on nga festival nga gin hiwat ko Hunyo 23 hasta kahapon nga adlaw it Dominggo.
Sambilog sa mga gin abangan sa rayang event hay ro motocross nga gin patigayon ko Sabado ag kahapon nga adlaw nga bukas para sa tanan.
Gin kalipay man kara nga may hatwan-an sanda it pangabuhian pamaagi sa mga naga baligya sa area it nagakasari-sari nga baeak-eonon.
Samtang gin seguro man eagi ni Kimpo nga mas panamion pagid nanda ro rayang event sa masunod nga dag-on ag igabutang kung ano ro mga kakueangan para mas mapami pa rayang Kalibo Riverside Sports Festival nga gina kabig nga bag-ong turismo sa nasambit nga banwa.
Kaangot kara mabahoe man do pagpasaemat ni Kimpo sa mga nagbulig para sa kadaeag-an ko rayang festival eabi eon gid sa Barangay Council it Tinigaw.
