iFM Laoag – Namulaan iti agarup pito gasut (700) a narra ken molave a kaykayo ti Paoay Lake National Park babaen iti law firm manipud Metro Manila ken 150 Environment Science students ti Mariano Marcos State University.
Inasisteran daytoy babaen kadagiti forest rangers manipud iti Environment and Natural Resources Office. Indauloan met ni Attorney Paolo S. Teston iti M&A Associates dagiti kakaduana a nakipagpasset iti nasao nga aktibidad.
Daytoy nasao a programa ket kapanunotan ni Atty. Liza Araneta-Marcos, asawa ni dati a senador Ferdinand “Bongbong” Marcos kadua iti China-Philippines Unified Enterprises Inc. ken ti M&A Associates nu sadinno gagemda a mapreserbar iti aglawlaw nangnagruna itan nga agbaliwen ti paniempo.
Segun met ken ni Forester Estrella “Baby” Sacro, project manager ti Barangay Ranger Officers (BRO) iti Ilocos Norte, masapol a saluadan dagiti umili iti aglawlaw babaen iti panagmula iti kayo ken kasta pay iti panangpadakkel kadagitoy. (Bernard Ver, RMN News)
