79 ka container van nga puno sa bugas, gipagawas na sa B-O-C

Gipagawas na sa Bureau of Customs o B-O-C ang 79 ka container van nga puno sa sako-sakong imported nga bugas.

Kini ang gibutyag ni Konsehal George Goking nga Chairman sa Committee on Trade and Commerce sa City council atol sa ilang Ocular Inspection sa iyang Committee sa pantalan sa Tagoloan sa milabayng semana.

Matud ni Goking nga tungod niini, gilauman nga mokanaog na ang presyo sa bugas nga gibaligya sa mga merkado.

Una pa niini, gipahayag ni Customs Deputy Collector Marvin Mison nga walay hoarding sa bugas dinhi sa Northern Mindanao.

Gipasabot ni Mison nga nalangan lang ang ilang pagpagawas sa 79 ka container van sa pantalan sa Tagoloan kay ila pa kining gipaagi sa insaktong proseso aron malikayan ang kasong smuggling.