Padayon hangtod karon ang gihimong imbestigasyon sa Bureau of Fire Protection kon BFP Quezon kung unsay hinungdan sa sunog nga miulbo sa Balangay 3, Poblacion, Quezon, Bukidnon niadtong Biyernes sa kadlawon.
Sa interview sa RMN Malaybalay ngadto kang SFO4 Merlito Rulida, ang hepe sa BFP Quezon gibutyag niini nga nangalap pa sila ug ebidensiya sa hinungdan sa sunog.
Matud niya nga duha ka mga dagkong balay ang gilamoy sa kalayo nga nagsugod sa balay ni Mrs. Gomez ug na-angin ang balay ni Mr. and Mrs. Felicidad Saspa.
Matud ni Rulida nga mukabat sa 800,000 pesos kapin kon kulang ang gibana-banang damyos sa mao nga sunog nga niabot sa 2nd alarm.
Nasayran nga pinaka-unang sunog kining natala sa BFP Quezon karong tuiga, apan nasundan usab kini kagahapon sa tulunghaan sa Barangay Salawagan kung asa gamay lamang ang mao nga sunog.
Nadali usab daw kini ug palong hinungdan nga gamay lang ang damyos.
Posibleng daan nga mga wiring ang hinungdan sa mao nga sunog.
