VICTORIAS CITY, NEGROS OCCIDENTAL – Cardiac Arrest ang gintunaan sang kamatayon sang isa ka 82-anyos nga lolo nga nasapwan patay sa sulod sang isa ka pension house sa Brgy. 5, Victorias City sadtong Sabado sang udto.
Ang biktima nga si Rodolfo Azucena, residente sang Had. Carugiat, Brgy. 13, ciudad sang Victorias ang nasapwan nga patay may mga las 12:30 sang udto sa Custodio Lodge sa Ditching Subdivision, Brgy. 5.
Si Lolo Rodolfo ang 16 ka bata kag kilala nga manugbulong sa syudad.
Ang iya kabaskog, ginakuha niya ini sa pagkuha sang GRO makatatlo ka beses kada semana sa diin sa lodging house, gibabauran nya ini sang tag P100 kada tatlo ka oras.
Base sa imbestigasyon sang pulis, mga las 9 sang aga sadtong Sabado sang nagsulod sa amo nga lodging house ang biktima upod ang isa ka GRO nga ginkilala gid lamang kay Grace.
Suno sa caretaker sang amo nga lodging house nga si Aileen Taboada, suki na nila si Lolo Rodolfo kon diin sa masami, GRO ang iya nga gina-dala.
Pahayag pa ni Aileen nga sa tagsa ka pagsulod sang biktima, halos isa ka oras gid lamang ang iya gina-tiner didto apang sang Sabado, natingala sila nga halos 3 ka oras na ang nakaligad wala gihapon naka-gwa si Lolo Rodolfo.
Bangud sini, ila na lamang ginkadtuan ang kwarto kag didto ila nakita nga bukas ang pwertahan kag sang ila gin-check nakita ang biktima nga wala na sang kabuhi, hublas kag wala naman ang upod sini nga GRO.
Sa post mortem nga ginpatigayon, suno kay PSupt. Herman Garbosa posible cardiac arrest ang ginkamatay sang tigulang bangud wala man ini sang pilas sa iya lawas.
Nagapanawagan karon si Garbosa kay Grace nga magguwa para sa kasanagan sang hitabo./dyHB BACOLOD
