Mikabat sa 882 milyones pesos nga kantidad sa sigarilyo ang nakumpiska sa Bureau of Internal Revenue kon BIR 10 ug National Bureau of Investigation 10 sa duha ka mga warehouse sa syudad niadtong Enero 21.
Matud ni Atty. Johaidah M. Darimbang, ang Atty. II sa Legal Division sa BIR 10 nga pinasikad sa Mission order nga gipagawas sa ilang Regional Director nga si Atty. Nuzar Balatero ilang gi ronda ang warehouse sa sigarilyo nga nahimutang sa Cugman ug Brgy. Bayabas.
Na recover sa warehouse nga nahimutang sa Brgy. Bayabas ang tres mil nga mga master cases nga nagkantidad sa 562,500,625 pesos, samtang mikabat sa 1,702 nga mga master cases ang ilang na kumpiska sa warehouse nga nahimutang sa Barangay Cugman nga nagkantidad og 320,063,750 pesos.
Nasayran nga ang maong mga sigarilyo, adunay peke nga BIR Stamp, samtang ang pipila niini, walay mga stamp, hinungdan nga gipang kumpiska sa BIR ug NBI.
Ang maong mga sigarilyo, adunay brand sama sa YS Filter, RED, Jackpot nga puti ug green, Bravo nga pula, Marvel Menthol, Marvels nga pula, ug Two Moon.
Kini nakalapas sa Sec. 236 o Unlawful pursuit of Business, Sec. 130 sa Failure to file Excise tax Return, Sec. 263 Unlawful possession or removal of articles subject to excise tax without payment of tax ug Sec. 265 o unlawful possession of spurious internal revenue stamp sa National Revenue Code.
