KALIBO, AKLAN — Patay ro sangka 9 nga dag-on nga ungang eaeaki matapos nga makuryente kahapon sa Brgy. Cayangwan, Makato, Aklan.
Nakilaea ro biktima kay Raffy Roldan Jr., ag residente it nasambit nga lugar.
Suno kay PO3 Clarito it Makato PNP nga nakabaton sanda it report kahapon nga may una nakuryente sa lugar ag anda nga ginrespondehan ag gin verify.
Nasayuran na nagsaka ro biktima sa atop ko andang baeay ag may idto nga wire nga may leakage nga ginapatihan naga duot sa atop nga sim ag gintunaan ko pagka kuryente it unga.
Insigida man nga gin pangayuan it ayuda sa Aklan Electric Cooperative ag nasayuran nga rong wiring halin sa poste paadto sa baeay hay bukon it service drop ag may mga leakage.
Nahadaea pa sa hospital ro biktima pero gin deklara man raya nga dead on arrival it doktor.
