Mikabat sa 941 ka mga tawo ang na-contact trace sa City Health Office sukad niadtong March 14 ngadto sa June 8.
Kini nga mga tawo maoy nahimong Close Contact sa mga tawo nga na-admit sa lain laing hospital ning syudad kay gidudahan nga natakdan sa sakit nga corona virus disease o COVID-19.
Matud ni City Health Officer Dr. Lorraine Nery nga gikan sa maong ihap, 77 niini ang kasamtangan nga gikurintinas lakip na ang mga tawo nga na-close contact sa usa ka covid positive nga taga dalan Dabatian, Barangay Carmen ning syudad sa Cagayan de Oro.
Samtang sa pikas nga bahin, mikabat sa 826 ka mga tawo ang nakapahimulos sa Online consultation sa City Health Office.
Kini nga record sukad niadtong April 22 ngadto sa June 8 ning tuiga.
Gikan sa maong ihap mikabat sa 162 niini ang nakit-an sa City Health Office nga dunay sintomas sa Acute Respiratory Illness kon ARI ug Influential Like Illness kon ILI.
-o0o-
