Normal na ang Aerial Horizontal Visibility sa atmosphere sa Cagayan de Oro ug Misamis Oriental ug uban pang lugar sa Mindanao.
Kini nagpasabot nga wala nay problima sa Haze nga gikan sa nasunog nga lasang didto sa nasud sa Indonesia, matud pa ni Luz Mercado, ang weather Specialist sa Pag-asa, Mindanao station sa Molugan El Salvador City sa Misamis Oriental.
Matud ni Mercado nga sugod niadtong Huwebes, mibalik na sa normal ang aerial Horizontal Visibility tungod kay hinay-hinay nang nawala aso ug abog nga nakatabon sa atmosphere sa Cagayan de Oro, Misamis Oriental ug bisan sa ubang lugar sa Mindanao.
Gibutyag ni Mercado nga nawala ang aso ug abog sa atmosphere tungod kay hinay-hinay nang mibali ang direction sa hanging Habagat ngadto sa Hanging Amihan.
“Napadpad ug balik sa Indonesia, ang aso ug abog nga mitabon sa atmosphere dinhi sa Mindanao, kay hinay-hinay na mang mibali direction sa hangin gikan sa Habagat, ngadto sa Hanging Amihan to easterly wind” matud ni Mercado.
Apan matud ni Mercado nga ang pagka usab sa direction sa Hanging, sugod kagahapon, ubos pa kini sa ilang gitawag nga “Transition Period”.
Gibutyag ni Mercado nga ang insaktong panahon sa North East Monsoon, mahitabo kini sa katapusan pang semana sa October o sa unang semana sa November.
Matud ni Mercado nga tungod kay transition period pa man sa Hanging Habagat ngadto sa Amihan, makasinati pa ang Mindanao sa kainit sa temperatura.
Kini sa rason nga wala pay dagko nga clouds formation.
“Basta walay dagko nga Clouds formation, init gyud kaayo ang Temperature kay wala may makasalipod sa siga sa adlaw” matud ni Mercado,
Alas 11 sa buntag niadtong Huwebes, mipatak ang Temperature sa Cagayan de Oro ug Misamis Oriental sa maximum nga 33.5 degrees Celsius.
