BACOLOD CITY – Natumba ang isa ka daku nga puno sang lunok nga kahoy pasado las 7 sini gid lamang nga aga malapit sa main entrance sang Block 1, Sharina Heights 1 Subdivision, Barangay Taculing, Bacolod City.
Suno sa report nga maswerte ang isa ka taxi nga nakita niya nga manugtumba ang amo nga kahoy gani ini ang nag-isol na lamang agud nga indi matumbahan.
Bangud sang kadakuon sang kahoy halos na-okupar sini ang bilog nga dalan sa amo nga block kag naglapos ini sa pader sang Sto. Niño Apartment.
Gilayon nga ginpadulungan sang mga katapo sang City Disaster Risk Reduction Management Office (CDRRMO) ang area kag ila gin-chainsaw ang kahoy agud indi ini makadulot sang trapiko.
Magluwas dira may kahoy man nga natumba sa area sang St. Peter, Barangay Alijis. /dyHB BACOLOD
