Davao City – Wala na kinahanglana pa nga ibalhin ang kasamtangan nga sentro sa panggobyerno nasud dinhi sa siyudad sa Dabaw gikan sa kaulohang Maynila.
Base sa balaud, ang kauluhang Manila maoy magsilbi nga capital sa Pilipinas ug sentro sa gahum sa kagamhanan ug ang tanang pangnasudnong buhatan hagbay ra naplastada.
Sumala ni Gabriela Partylist Representative Emmie De Jesus, mag-usik lang og salapi ang kagamhanan kun i-relokar ang capital sa nasud busa supak ang magbabalaod nga balhinon ang kabisera.
Giluwat ang maong pamahayag ni De Jesus human gisugyot sa Kabayan Partylist nga mas maayo ibalhin ang capital sa nasud dinhi sa dakbayan sa Dabaw.
Segun ni De Jesus, ang planong pagbalhin sa kabisera sa nasud nagpaklaro lang nga walay planong muka-naog sa katungdanan ang kasamtangan nga mga opisyal sa gobyerno ug usa ra ang ilang tumong mao ang pagpabilin sa katungdanan.
Walay nakitang rason si De Jesus aron ilisan ang ‘seat of government’ gikan sa kaulohan paingon na dinhi sa dakbayan sa Dabaw.
Gawas nga political accommodation, ang mao nga lakang klaro daw nga ang kaugalingong interest ug kagustohan lang ang gialagaran aron mugawas nga ang pamuno-nasud lang ang maila nga labing maayo sa tanan.
Giingon pa sa Magbabalaod nga ang ginaduso nga pederalismo sa political party sa presidente nga mao ang PDP-LABAN dalan na aron mahatagan og katumanan ang tanang tinguha nga mabalhin ang capital sa pilipinas gikan sa maynila dinhi na sa Davao City.
RadyoMaN Joel Viray
