Kalibo, Aklan – Nakaaresto rong Aklan police it 37 ka mga nagbayolar sa 38 ka mga operations nga ginpatigayon it mga kapulisan sa pag implementar it Comelec gun ban.
Ro nasambit nga kampanya hay nag-umpisa ko Enero 13 ag nagtapos ko Hunyo 12 it tungang gabii kung sa siin nagresulta sa pagkakompiskar it 12 ka mga baril ag 25 ka mga mataeom nga hinangiban.
Sa 38 ka mga operations, 6 kara ro sa Oplan Sita ag Galugad, 22 ro sa ginrespondehan it mga kapulisan, 7 ro sa checkpoints, 1 ro sa illegal gambling ag 1 ro sa buy-bust operation.
Suno kay PCOL. Esmeraldo P Osia Jr., Officer-in-Charge it Aklan PPO nga rong kadaeag-an ko nasambit nga implementasyon it Comelec gun ban hay resulta it sari-saring police operations ag anti-criminality campaign it mga kapulisan sa Aklan.
Ginpasaeamatan man ni Osia ro tanan nga mga miyembro it kapulisan sa probinsya nga nag perform it mayad bago ag pagkatapos it election period kamana man ro miyembro it Armed Forces of the Philippines (AFP) ag mga stakeholders ag kumonidad nga nagtao it kooperasyon nga maging matawhay ag sa insakto ro 2019 midterm election.
