Tulo ang patay, 28 ang samaran sa dihang na-aksidente ang usa ka bus mga alas 3:40 kagahapon sa hapon sa Purok 2, Barangay Patpat, Malaybalay City, Bukidnon.
Matud ni Police Regional Office 10 Spokesperson Supt. Lemuel Gonda nga ang tulo ka mga namatay mao silang Regine Abug, 10 anyos nga taga Purok 2, Brgy. Maligaya, Malaybalay City, Irene Gaa, 33 anyos, minyo nga taga Barangay Carmen, Cagayan de Oro ug ang pedestrian mao si Jomiaca Tacay, 14 anyos nga taga Barangay Patpat, Malaybalay City, Bukidnon.
Gibutyag ni Gonda nga lakip sa mga na-angol ang driver ug konductor sa Rural Transit Mindanao Inc. o R-T-M-I Bus nga nagdala sa Plate Number K-V-R 367.
Samaran usab sa maong aksidente si SPO3 Espijon nga nadestino sa Impasug-ong Municipal Police station.
Sa karon padayon pang gi-imbistigahan sa traffic Investigator sa Malaybalay City Police Station ang maong insedente samtang ang 28 ka mga samaran nadala sa lain laing ospital sa Malaybalay City.
PC: Jade Grupo and Katawa CDO Doodzkie
