Akyat-bahay suspek nakulatahan

9

Davao City – Samad duol sa duha ka kilay ug bun-og sa kalawasan ang natilawan sa usa ka gidudahang akyat-bahay human gikulata sa mga residente nga nakasakop kaniya ganinang kadlawon.

Nasayran nga napungot na ang mga residente sa Zone 5 San Vicente Buhangin gumikan sa serye nga insidente sa panaka og balay sa mga kawatan mao nga wala na makapugong ang mga nanimuyo ug gikulata si James Tapidan, 23 anyos, ulitawo, ug nagpuyo sa Malita, Davao Occidental, sa dihang ilang naatlan ang suspek nga mikatkat sa atop sa balay ni Raymund Cobero alas 2:30 kaganinang kadlawon.

Suma ni Cobero, natugaw ang ilang pagtulog tungod sa kabanha sa atop busa gilayon ilang gisusi ang hinungdan sa kabanha.

Apan nangangha ang tagbalay gumikan kay ang ilang nakita mao ang suspek.

Musuway pa unta og lukso si Tapidan sa laing tampi apan nasakuti gihapon siya sa mga silingan ni Cobero nga una nang nakamatikod mao nga gikulata ug nabun-og kini una paman hingpit na-endorso sa Buhangin PNP.

Depensa ni Tapidan nga nag-inum matud pa sila sa iyang mga kaubanan sa trabaho apan misangko sa bikil ug pagsinumbagay mao nga misaka kini sa atop sa balay sa pamilyang Cobero.

Apan wala toho-i sa kapulisan ang katarungan sa suspek maong gipaslak kini sa selda sa Buhangin PNP samtang gi-andam na ang tukmang kaso batok kaniya.

RadyoMaN Joel Viray

Facebook Comments