General Santos City–Hugtanong gihimakak sa dinakpan sa Police Station 2 nga itago lang sa pangalang Alias Rey, legal age, habal-habal driver ug residenti sa Purok Lanton, Barangay Apopong, nga iyaha ang shabu nga gikaingong napalit sa kapulisan ngadto kaniya atol sa gihimong buy-bust operation niadtong nakalabayng gabie.
Matud sa suspek nga si Alias Rey nga siya gibutangan lang ug ebidensya aron nga madakpan ug mabalhog sa prisohan. Gihingusgan pa niini nga wala siya nagagamitan ug iligal nga droga ug wala usab siya nagapamaligya niini.
Una nang nasikop ang suspek alas 8:30 ang takna sa gabie sa may Purok Malipayon, Barangay Labangal, Gensan kung asa napalitan kini ug usa ka sachet sa gituohang shabu gamit ang P500 nga marked money.
Nasayran nga ang si Alias Rey ang gireklamo usab sa kabanay sa iyang asawa ug pagpanglugos sa iyang kaugalingong anak tulo na ka tuig ang nakalabay.
