Naturn-over na sa iyang pamilya ang usa ka babayeng miyembro sa New People’s Army kon NPA nga napatay sa NAHITABONG engkwentro tali sa 1st Special Forces Batallion ubos sa 403rd IB,Philippine Army ug NPA sa Sitio Tun-ogan, Brgy. Lilingayon, siyudad sa Valencia niadtong Biyernes sa hapon.
Sa interview sa RMN DXMB Malaybalay ngadto kang BGEn. Ferdinand Barandon, ang commander sa 403rd Infantry Brigade gibutyag niini nga nakabaton sa engkwentro ang 1st SFB ug NPA ilawom sa Guerilla Front 68-B nga nagresulta sa pagkamatay sa mao nga amasona nga taga Brgy. Namnam, San Fernando, Bukidnon.
Giila ni Gen. Barandon ang namatay nga si Jeraline Cabasag alyas Margo, alyas Maxine hingkod ang edad nga usa ka political instructor sa Guerrilla Front 68-B, SRC4.
Nagtoo usab ang kasundaluhan nga aduna pay daghan nasamdan sa habig sa NPA human nga adunay mga lama ug pat-ak sa dugo ang narekober sa encounter site.
Gibutyag sa heneral nga gawas sa narekober nga M-14 rifle nakita usab ang daghang kagamitan sa mga nakasibat nga mga rebelde nga naglakip sa mga bala, improvised explosive devices, tambal ug subersibong mga dokumento sa kalihukan.
Nasayran nga hideout sa NPA ang nailog sa kasundaluhan human nga adunay sumbong nga ilang nadawat gikan sa mga sibilyan.
Sigun ni Gen. Barandon nga naka-ikaduhang engkwentro usab ang 1st SFB sa mao nga grupo niadtong Sabado sa hapon hinoon walay natalang nasamdan sa mao nga panagsangka.
