SILAY CITY, NEGROS OCCIDENTAL – Halos triple karon ang kasubo nga ginabatyag sang isa ka lamharon nga iloy bangud wala labot nga napatay ang iya bana, napatay pa ang kapid nga lapsag nga iya ginabusong.
Nakilala ang iloy na si Remarie Trayco, 18 anyos ang edad, tumandok sang Hacienda Purisima, Brgy. Concepcion, Talisay City kag temporaryo nga naga-puyo sa Hacienda Himogaan, Brgy. E. Lopez, Silay City upod ang iya live-in partner nga si Joseph Dato, 20 anyos ang edad, isa ka bagger sa isa ka Hypermart.
Ginpahayag nga sadtong June 20 sang kaagahon, nagbugtaw si Remarie nga patay na ang iya bana nga si Joseph bangud sang cardiac arrest.
Sang gab-i palang sina, ginapatay ni Joseph ang electric fan bangad natugnawan ini apang ginapaandar naman ni Remarie bangod nagin-utan sya sa iya sitwasyon nga manugbata.
Sa amo man nga adlaw naka-schedule ang regular nga check-up ni Remarie kon diin gindayon niya ini samtang nga ginahimos man ang bangkay sang iya bana.
Sang yara na sa ospital, wala na ginpapauli pa si Remarie bangud nga 5 cm na ini kag manug-bata na, apang sang June 24, ginpasugtan ini nga makapauli sa ila balay agud maka-kadto sa haya sang iya bana.
June 27 nagbalik sa Teresita Jalandoni Provincial Hospital si Remarie bangud nagpasakit na ini sang iya tiyan kag manug-bata nagid.
Kahapon, June 29, las 6 sang aga nagpasakit na gid si Remarie kon diin suno sa iya iloy nga si Lisa Trayco, nakita nila nga nabudlayan ang iya bata gani naghingyo sila sa ospital nga kon pwede ipaidalum na lamang ini sa Caesarian Section ukon CS.
Apang, imbes nga i-encourage, nagpamangkot pa ang isa sa mga nurse sang ospital nga “mapa Caesarian kamo, nga-a may kwarta kamo?”.
Didto kag napilitan si Remarie nga ipagwa sa normal nga paagi ang kapid niya nga bata kag sang nag-gwa na ang una nga lapsag, ini ang wala sang kabuhi ukon patay.
Bangud sini, gindali-dali na lang preparar sang ospital si Remarie nga ipaidalum sa CS matapos nakita ang indi maayo nga kondisyon sang una nga lapsag.
Apang, sang pagwa sang ikaduha nga lapsag ni Remarie, ini ang patay man sa gihapon.
Ini nga bagay ang tuman nga ginkasubo kag ginka-dismaya sang pamilya ni Remarie gani nagapangayo sila karon sang hustisya sa natabo sa ila himata.
Sa interview sang dyHb sa iloy nga Lisa nagapanawagan ini kay Governor Alfredo Marañon, Jr. nga korehiran ang sistema sa provincial hospital ilabi na ang pagtraton sa mga pigado.
Gintalana sini nga adlaw ang lubong ni Joseph upod na ang napatay nga kapid niya sini nga bata nga ginbutang man sa iya luyo.
Sa karon ginahulat pa ang official statement sang tagdumalahan sang Teresita Jalandoni Provincial Hospital angut sa amo nga hitabo./ Litrati sang magpartner nga Joseph kag Remarie kag sa idalom, lungon ni Joseph uppd ang iya duha ka kapid nga napatay.
