Patay ang upat ka tawo samtang tulo ang samaran sa pag-ambush kagahapon sa buntag kang Pantao Ragat, Lanao del Norte Mayor Lacson Lantud.
Nasayran nga mibisita ang maong opisyal sa usa ka proyektong gipahimo niini sa Brgy. Cabasagan sa Pantao Ragat apan kalit lamang mitunga gikan sa kilid sa dalan ang kapin sa lima ka wala mailang mga armadong lalaki dayong pusil sa gisakyan sa mayor.
Matud ni Mayor Lantud nga bisan kon gipamusil na sila nagpadayon sila sa pagpadagan tungod kay kung mohunong sila hayan mamatay silang tanan sa maong dapit.
Atol sa insidente, dead on the spot si Barangay Chairman Kalic Disamburun ug ang katorse anyos nga si Tarapas Saro samtang dead on arrival sa Balo-i Provincial Hospital si PO1 Mahid Macalaba ug pag-abot sa Iligan City hospital gideklarar usab nga dead on arrival si Casanuding Hasim.
Wala usay naangkong samad si Mayor Lantud kinsa gituhoang maoy target sa nasangpit nga pagpang-ambush.
Nagpabilin pa usab nga nagpaayo sa Adventist Medical Center sa Iligan City ang tulo ka samaron nga silang PO1 Hamza Mangonte, SB Member Acmad Magomnang ug Farmon Macarimbang.
Nasayran basi sa imbistigasyon nga giunhan ni Police Senior Insp. Recto Iwangan ang Acting Chief of Police sa Pantao Police Station nga Rido o away sa mga angkan ang motibo sa krimen.
Sa karon padayon pang giila sa kapolisan ang nagpaluyo sa maong pagpang-ambush aron mahatagan sa hustisya ang gidangatan sa mga biktima.
