General Santos City–Blangko ang amigo sa habal-habal driver nga si Armand Ponteres, 43 anyos, nga taga Purok San Miguel, Barangay Calumpang, Gensan sa motibo sa pagpamusil kaniya, alas 6:45 ang takna sa gabie sa may Block 5, Purok San Miguel, Barangay Calumpang.
Sumala ni Anicito, amigo sa biktima ug residenti ra usab sa lugar nga nakurat nalang siya dihang nadawat ang report nga gipusil ang biktima.
Suod matud pa silang higala ug sila kanunay mag-uban hilabi na kung muadto sila sa sabungan.
Dugang pagbutyag ni Anicito nga ayha nahitabo ang pagpamusil, wala may naestorya kaniya ang biktima nga adunay nagbahad sa iyang kinabuhi.
Gani sumala pa panahon nga sila magkita ug magtapok sa tornohan sa habal-habal sa ilang lugar, ang mga gisudlan niining investment scheme ang ilang topic ug wala gyud kini nasulti nga aduna kini nakabingkil.
Usa usab kini ka buotan ug komedyante nga matang sa tawo gani dawsa dili matud pa katuohan nga kini patyon.
Bisan na ang pamilya sa biktima blangko pa sa motibo sa pagpamusil patay kang Armando Ponteres.
Matud sa bayaw niini atol sa pakighinabi sa RMN News Team, iyang gibutyag nga wala gyud silay nasayran nga may nakalaban ang biktima o nakalalis manlang sa ilang lugar ayha kini gipusil patay.
Tungod niini bisan sila nahibulong kung unsa gyud nag hinungdan nga gipatay ang biktima. panghinaot nalang nila nga unta mahatagan ug hustisya ang nasampit ug mailhan ang suspek sa krimen.
