BACOLOD CITY – Ginhilway na si anay Barangay 35 Punong Barangay Maui Huelar matapos ang halos duha ka tuig nga pagkabilanggo bangud sang kaso nga violation sang Section 5 and 11 sang RA 9165 ukon illegal drugs.
Suno sa Jail Warden sang Metro Bacolod District Jail Male Dormitory Annex sa Brgy. Handumanan Bacolod City, Norberto Miciano Jr., nga sadtong Biernes, December 14, gin-release si Manuel Huelar Jr., ukon mas kilala kay Maui Huelar.
Ginpahayag ni Miciano nga ginhilway si Huelar matapos nga ini ang nag apply sang ‘plea bargaining agreement’.
Madumduman nga sadtong tuig 2016, si Huelar upod ang isa pa ka suspek nga si Christian Joseph Mijares ang nadakpan sa ginpatigayon nga buybust operation sang PDEA sa sulod sang isa ka inn sa Liroville Subdivision, Brgy. Singcang, Bacolod City.
Bangud sini, nagpangatubang si Huelar sang kaso nga violation of Section 11 and 5 sang Republic Act 9175 ukon Illegal drugs.
Sa pagpakig-angot sang dyHB kay Huelar, iya ginsiling nga indi lang anay maghatag komento sa iya pagguwa.
Halos duha ka tuig man nga na-detain ang anay basketball player nga si Huelar sa amo nga facility.
Ang plea bargaining ginahatag nga prebilihiyo sa mga nadakpan sa illegal drugs nga indi magtaas sa one gram ang recovery sa buy bust.
Nahibaluan nga nauna nga gin-release si Mijares sa detention kag duha ka adlaw matapos, ginhilway man si Maui./dyHB BACOLOD
